Унутры замкавых сцен XVI стагоддзя ў Палацы Баторыя была знойдзена сцяна Вітаўта XIV стагоддзя, паведамляе Newgrodno.by.
Начальнік упраўлення культуры Гродзенскага аблвыканкама Алена Клімовіч расказала, што праект аднаўлення замка «сутыкнуўся з дыскусіямі», але чыноўнікам удалося дабіцца згоды ў Мінкульце.
Цяпер ідуць праектныя работы па рэканструкцыі Палаца Стэфана Баторыя. У гэтым працэсе, як і з першай чаргой рэканструкцыі, удзельнічае інстытут «Гроднаграмадзянпраект». Праектаванне другой чаргі работ знаходзіцца на завяршальным этапе.
Унутры замкавых сцен XVI стагоддзя (у гэты час ён перабудоўваўся) знаходзіцца сцяна часоў Вітаўта XIV стагоддзя. Яе выявілі падчас натурных даследаванняў, і яна будзе экспанавацца як важны гістарычны і архітэктурны элемент.
Раней NewGrodno.by паведамляла, што на рэканструкцыю Палаца Баторыя, праект якога быў раскрытыкаваны гісторыкамі, плануецца выдаткаваць 80 мільёнаў рублёў.
Спрэчная рэканструкцыя першай чаргі ў Старым замку ў свой час каштавала 28 мільёнаў рублёў. Пры гэтым была пабудавана Камяніца, якой не было ў замку, затое дэмантавалі для яе будаўніцтва каменную брукаванку часоў Вялікага князя Вітаўта.
Цяпер да Палаца Стэфана Баторыя можа быць прыбудаваны масіўны рызаліт, прадугледжаны праектам, распрацаваным архітэктарам Бачковым. Праўда, археалагічныя даследаванні абверглі яго існаванне.
Нагадаем, што другая чарга рэканструкцыі Старога замка па планах павінна пачацца ў 2025 годзе.
Прыслухаўшыся да спецыялістаў, якія заклікалі не знішчаць сведчанні гістарычных пераменаў у замку, архітэктары вырашылі захаваць асноўныя сляды перабудоў XVII, XVIII і пачатку XX стагоддзя. Элементы, якія перашкаджаюць успрыманню палаца і не ўяўляюць гістарычнай каштоўнасці, прыбяруць.
Падпісвайцеся на культурныя навіны Reform.news у Telegram
Если вы нашли ошибку, пожалуйста, выделите фрагмент текста и нажмите Ctrl+Enter.