«Аддаючы любоў і боль»: сёння вольныя Купалаўцы чытаюць «Гардэнію» і запрашаюць далучыцца

«Купалаўцы LAB» — так называецца новы праект незалежнай тэатральнай групы, у рамках якога артысты паспрабуюць сябе ў новай якасці. «Эксперыменты, імёны, спробы, удачы і падзенні – усё, што мы хацелі зрабіць, але баяліся паспрабаваць», — даюць анонс новай лабараторыі творцы.

Сёння, 3 ліпеня, у рамках праекта Купалаўцы запрашаюць на прэм’еру чыткі «Гардэнія» па аднайменнай п’есе польскага драматурга і журналісткі Эльжбеты Хаванец. Рэжысёрам формы выступіць купалавец Пётр Непагода, для якога пастаноўка — дэбют на купалаўскай сцэне.

«Чатыры жанчыны, чатыры лёсы, чатыры адбіткі часу, чатыры шляхі. Такія розныя звонку і такія блізкія знутры. Што мы ўкладаем у тое, што называем любоўю? Дзе тая мяжа паміж матчыным клопатам і болем? Колькі разоў за жыццё чалавек знаходзіць у сабе сілы прызнаць памылкі, папрасіць прабачэння або прабачыць самому (самой)? Ці здольныя мы самі пачуць і зразумець іншую генерацыю?», — уводзяць у кантэкст п’есы артысты.

«Вечныя канфлікты пакаленняў, якія толькі наладжана ламаюць чалавечыя жыцці. Аддаючы любоў, мы нараджаем любоў. Аддаючы боль, мы атрымліваем боль у адказ. Няздольнасць і няўменне выказаць свае пачуцці самым блізкім забіваюць любоў пакаленнямі.

Ці ёсць выйсце з гэтага бясконцага ланцугу непаразумення? Ці хопіць сіл перавярнуць хаду ўласнай гісторыі? Адказ у руках і ў сілах кожнай жанчыны, кожнага чалавека. Ані аўтарка п’есы, ані мы не маем дакладнага рэцэпту дасканалых адносін, але запрашаем да гэтай цяжкай і патрэбнай размовы», — даецца анатацыя твору на старонцы Купалаўцаў у Facebook.

Нагадаем, што фармат чыткі мае на ўвазе працу не толькі актораў і рэжысёра, але і цэлай каманды адмыслоўцаў. Пералічым тых, хто ўключыны ў праект. Мастак па святле – Мікалай Суркоў. Кампазітар – Андрэй Еўдакімаў. Гукарэжысёр – Яўген Шанюк. Мантаж — Таццяна Паўлава. Памочніца рэжысёра – Алеся Бельская. Пераклад п’есы – Марыя Пушкіна.

Ролі выконваюць: Валянціна Гарцуева, Марта Голубева, Крысціна Дробыш, Антаніна Дубатоўка.

Глядзець прэм’еру пастаноўкі можна на афіцыйным Youtube-канале вольных артыстаў.

У наладах відэа вы можаце знайсці тэкставыя субтытры на беларускай, польскай, рускай і англійскай мовах, — нагадваецца ў апісанні.