Фота: сацсеткі выдавецтва "Мяне няма".
Новая кніга беларускай пісьменніцы Таццяны Заміроўскай будзе называцца «Эвридика, проверь, выключила ли ты газ». Выдавецтва «Мяне няма» анансуе навінку як «першую немастацкую кнігу» аўтаркі «Жизни без смерти и боли», «Земли случайных чисел», «Воробьиной реки», рамана-бэстселера «Смерти.net».
«Эвридика, проверь, выключила ли ты газ» — гэта зборнік эсэ, успамінаў і развагаў пра памяць і забыванне, музыку і каханне, эміграцыю і сувязь з Беларуссю праз прывідную ідэнтычнасць чалавека, які калісьці верыў, што музыка — мацней за смерць, а тэкст — важнейшы за жыццё», — адзначаецца ў анатацыі да выдання.
На дадзены момант «Мяне няма» прымае замовы на друк кнігі.
«Мы ўсё яшчэ невялікае выдавецтва і ўсё яшчэ працуем без грантаў і спонсараў, а таму нам важна сабраць грошы перад друкам. Аўтарскі ганарар, таксама, дарэчы, залежыць ад колькасці вашых замоў», — падкрэслівае кіраўнік выдавецтва, пісьменнік Павел Анціпаў.
Кнігу плануюць рассылаць з 14 кастрычніка.
Зрабіць замову на новае выданне можна на сайце «Мяне няма».
Таццяна Заміроўская нарадзілася ў Барысаве. Шмат гадоў працавала журналістам і музычным крытыкам у Мінску. З 2015 года жыве ў Нью-Ёрку, дзе напісала некалькі зборнікаў мастацкай прозы ў жанры метафізічнай фантастыкі і раман-бэстсэлер «Смерти.net». Аўтарка з’яўляецца лаўрэатам шматлікіх літаратурных прэмій. Па апавяданнях Таццяны Заміроўскай украінскі рэжысёр Міхаіл Лук’яненка зняў два кароткаметражных фільма — «Рабаванне» і «Жыццё без шуму і болю».
Падпісвайцеся на культурныя навіны Reform.news у Telegram