У Вільні адбудуцца КінаКаляды48 — чэлендж для аматараў кіно і беларускай культуры з усяго свету

Ужо трэці год у Вільні каманда CreateCulture Group на чале з Надзей Ількевіч і Таццянай Штэйнбук ладзіць праект КінаКаляды48 — творчы марафон для аматараў кіно і беларускай культуры з усяго свету. Сутнасць чэленджу ў тым, што ўдзельнікі і ўдзельніцы праграмы за 48 гадзін мусяць напісаць сцэнар і зняць кароткаметражны фільм па тэме беларускіх Калядаў. Па выніку ўсе створаныя работы аб’ядноўваюцца ў альманах і дэманструюцца на вялікім экране ў кінатэатры. Ды журы вызначае найлепшых па дзевяці намінацыях. Цікава? Анягож!

48 Hour Film Project з’яўляецца глабальным конкурсам, які ладзіцца ў больш чым 100 гарадах. У Вільні спаборніцтва ад імя беларусаў афіцыйна ладзіць CreateCulture Group, якая сёлета ў чарговы раз запрашае ўсіх зацікаўленых далучыцца да новай эдыцыі праекта.

Арганізатары нагадваюць, што ў гэтым годзе, як і заўжды, праект адкрыты для ўсіх, незалежна ад узроўню падрыхтоўкі, а таксама геаграфічнай прывязкі.

Асаблівасці КінаКалядаў у 2024 годзе:

• Тэма фільма — пераасэнсаванне традыцыі беларускіх Калядаў. Ад абрадаў — да песень і масак.
• Адукацыйны курс: Разам з кінафестывалем ладзіцца серыя трэнінгаў падрыхтоўкі да чэленджу.
• КінаМіксер: 27 лістапада адбудзецца сустрэча, каб пазнаёміцца, далучыцца да камандаў, якія існуюць, або стварыць уласную.
• Паказ фільмаў: 21 снежня ў кінатэатры Вільні — кульмінацыя праекта, дзе будуць узнагароджаны лепшыя фільмы і ўдзельнікі.

Конкурс прапануе прызы па намінацыях: «Найлепшы фільм», «Найлепшая рэжысура», «Найлепшы мантаж», «Найлепшая музыка», «Найлепшае мастацкае рашэнне», «Найлепшае акторскае майстэрства», «Найлепшае трапленне ў жанр», «Найлепшае выкарыстанне каляднага элемента». Адмысловае журы, якое будзе вызначаць пераможцаў, будзе абвешчана незадоўга да паказу.

Зараз адкрытая рэгістрацыя на ўдзел у праекце  — сам праект адбудзецца з 13 па 15 снежня 2024 года.

Падрабязней пра КінаКаляды48 можна дазнацца тут.

Паглядзець фільмы папярэдніх удзельнікаў праекта тут.

Падпісвайцеся на культурныя навіны Reform.by у Telegram