Фота: barbican.org.uk
Учора, 15 верасня, у лонданскім «Barbican» адбылася прэм’ера оперы «Дзікае паляванне караля Стаха» Беларускага Свабоднага тэатра — доўгачаканай прэм’еры паводле аднайменнага рамана Уладзіміра Караткевіча. Сёння а 20.40 (па мінскім часе) тэлеканал «Белсат» робіць трансляцыю паўторнага паказа чаканай пастаноўкі Мікалая Халезіна — беларускія гледачы атрымаюць магчымасць убачыць нашумелую прэм’еру ўвечары не толькі ў эфіры тэлеканала, а і на YouTube.
Згодна з ліцэнзійнымі патрабаваннямі, трансляцыя на YouTube будзе дасяжная выключна на тэрыторыі Беларусі, Украіны, Грузіі, Арменіі, Расеі, Азербайджана, Казахстана, Кыргызстана, Малдовы, Таджыкістана, Туркменістана і Узбекістана, паведамляе тэлеканал.
Без тэрытарыяльных абмежаванняў трансляцыя будзе весціся ў спадарожнікавым эфіры «Белсата» ды кабельных сетках. Уладальнікам смартфонаў і тэлевізараў з функцыяй «Smart» раяць усталяваць аплікацыю «Belsat Smart».
Спектакль ідзе на беларускай мове з англійскімі субтытрамі.
Па словах рэжысёра і арт-дырэктара Беларускага Свабоднага тэатра Мікалая Халезіна, тэатру важна, каб пастаноўку пабачылі не толькі ў Лондане, але і ў Беларусі.
«Дзікае паляванне караля Стаха» – сінтэз оперы, драматычнага тэатра, мультымедыя і жывой музыкі, пазначаны жанрам «гатычны нуар». У спектаклі прымаюць удзел артысты з Беларусі і Украіны.
Музыку напісала кампазітарка Вольга Падгайская, лібрэта стварылі Мікалай Халезін і Андрэй Хадановіч, рэжысёры – Мікалай Халезін і Наталля Каляда, дырыжор – Віталь Алексяёнак, харэографка – Марыя Сазонава.
На жаль, беларускі спявак Ілля Сільчукоў не здолее выступіць на прэм’ерным паказе, але, магчыма, далучыцца да праекта пазней.
Глядзець трансляцыю можна тут.