Фестываль мастацтваў «Марк Шагал 2023» адбудзецца ў Іерусаліме

Творы Марка Шагала на мінскай выставе беларускай і сустветнай кніжнай і станковай графікі. Фота: Reform.by

У гэтым годзе адзначаецца 136-я гадавіна з дня нараджэння Марка Шагала.

Святкаванні дня нараджэння вялікага майстра распачнуцца ў Іерусаліме.

Мерапрыемствы адбудуцца на розных пляцоўках Іерусаліма, удзел у іх будуць браць таксама і беларускія мастакі і выканаўцы, а са сцэнаў будзе гучаць беларуская мова.

9 ліпеня на плошчы Марка Шагала ў Іерусаліме пройдзе адкрыццё ІІІ фэстывалю мастацтва і творчасці, прысвечанага 136-му году са дня нараджэння Марка Шагала.

«Гэты фестываль «Марк Шагал 2023» будзе сапраўдным святам мастацтва. Выставы, тэатральныя пастаноўкі, канцэрты, прэзентацыі, лекцыі.

У рамках канцэртаў будуць гучаць беларускія песні, оперныя арыі, музычныя творы французскіх кампазітараў.

Мы прапануем вельмі цікавую выставу, якая пройдзе на працягу ліпеня«, — паведамляе адна з удзельнікаў фестывалю фальклорная спявачка Ірэна Катвіцкая.

Адбудуцца прэм’еры тэатральных пастановак, а таксама цікавыя лекцыі запланаваны на ўвесь тэрмін фестывалю.

13 ліпеня пройдзе вялікі канцэрт у зале YMCA.

Праграма канцэртаў складзена такім чынам, што акрамя беларускай музыкі будуць оперныя творы, песні на ідыш і французскай мове. Класічная і народная музыка, танцы і балетныя творы.

5 ліпеня

Прэм’ера монаспектаклю «Ідэальная баба».

Аўтар і рэжысёр: Рыгор Какоўкін

Выканаўца галоўнай ролі: Андрэй Белацаркоўскі

Мастак-мультыплікатар: Павел Ермолаў

Кампазітар: Аляксандр Жадаў

9 ліпеня

Урачыстае адкрыццё Фестывалю мастацтва і творчасці, прысвечанага 136-му году з дня нараджэння мастака, на плошчы Марка Шагала ў Іерусаліме. На канцэртах будуць гучаць беларускія песні ды оперныя арыі.

13 ліпеня

У межах Фестывалю ў залі YMCA адбудзецца канцэрт з удзелам оперных салістаў: Кацярыны Чэпелевай, Адэліі Шалеў, Міхаіла Гайсінскага.

Фальклорная спявачка Ірэна Катвіцкая парадуе прысутных народнымі спевамі.

У праграме: арыі і дуэты з опер Моцарта, Вэрдзі, Бізэ, Пучыні; раманс Дэліба, маналог Тэўе з мюзікла «Скрыпач на даху».

Мовы песень – іўрыт, ідыш, французская і беларуская.

Канцэртмайстар: Аляксей Палянскі

Дарэчы, у Віцебску дзень нараджэння майстра будуць адзначаць 7 ліпеня. Ініцыятарам праграмы стане Музей Марка Шагала.