Фестываль інтэлектуальнай кнігі Pradmova выклаў праграму анлайн-сустрэч

2 і 3 лістапада фестываль Pradmova запрашае на анлайн-сустрэчы з аўтарамі, аўтаркамі, даследчыкамі і выдаўцамі, якія абмяркуюць літаратуру, гендарныя аспекты культуры, сучасныя тэхналогіі і візуальныя формы. Праграма ўключае прэзентацыі, дыскусіі і майстар-класы, якія можна глядзець на старонках фестывалю на YouTube і Facebook.

• Пройдзе дыскусія з аўтаркай і перакладчыцай кнігі «Мое Баба — Діректор Морга» Вольгай Аполька (Голя з Ополя) і Вольгай Касцюк;
• Паэт і перакладчык Алесь Плотка і тэатразнаўца Наталля Валанцэвіч пагавораць пра актуальнасць сыракомлеўскіх п’ес у ХІХ стагоддзі і сёння і пра тое, як адбывалася праца над перакладам знакавай драмы Уладзіслава Сыракомлі «Каспар Карлінскі»;
• Прадстаўнік Амерыканскай асацыяцыі выдаўцоў Мэцью Стратан распавядзе, што сабой уяўляе прэмія за свабоду слова, каму і па якіх крытэрах яна ўручаецца;
• Альміра Усманава прэзентуе нумар часопіса «Топас», тэма якога: «Гендар і матэрыяльная/нематэрыяльная праца»;
• Адбудзецца прэзентацыя выдавецтва Grunwald Publishing (Таронта, Канада) з удзелам Вольгі Яноўскай. Выдавецтва толькі пачало сваю працу, і яго асноўны кірунак — гэта пераклад беларускай літаратуры на англійскую мову і выданне кніг для англамоўнай аўдыторыі;
• Міхаіл Волчак прэзентуе зін Pamylka, накіраваны на аб’яднанне навукоўцаў і творцаў у галіне прыродазнаўчых і тэхнічных навук;
• Вольга Гапеева і Гун-Брыт Колер абмяркуюць паэтычны зборнік «Пад асобнымі коўдрамі» і раман «Самота, што жыла ў пакоі насупраць»;
• Антось Сівых падзеліцца спосабамі адаптацыі паэзіі да лічбавых і візуальных фарматаў;
• Спікеры «Марсіянін па-беларуску» распавядуць пра гендарныя і сацыяльныя аспекты беларускага выдання бестселера;
• Адбудзецца прэзентацыя кнігі «Советская Белоруссия» пад рэдакцыяй Міхася Чарота», якая выйшла ў выдавецтве Сhabor Publishing;
• Алена Гапава прэзентуе праект «Календары: Жанчыны Беларусі»;
• Ала Пігальская прадставіць праект па гістарычных шрыфтах у сучасным дызайне.

Цалкам праграму можна паглядзець тут.

Падпісвайцеся на культурныя навіны Reform.news у Telegram