«У часе ўсё больш моцнай і агрэсіўнай беларускай ды расейскай прапаганды аслабіць, а тым больш згубіць «Белсат» было б скрышальна», — Беларуская незалежная кінаакадэмія звярнулася да польскіх уладаў з заклікам захаваць беларускі тэлеканал і яго самастойнасць. Ліст у падтрымку незалежнага медыя сёння быў адпраўлены ў канцылярыю прэм’ер-міністра Польшчы Дональда Туска, міністру замежных спраў Радославу Сікорскаму, уладам тэлебачання TVP.
Беларуская незалежная кінаакадэмія ў сваім лісце звярнула ўвагу на значнасць працы «Белсату» ў часы «паўнавартаснай, брутальнай і беспрынцыповай інфармацыйнай вайны» ў Беларусі. Наколькі важнай і вырашальнай у гэтай вайне з’яўляецца інфармацыйная прадукцыя тэлеканалу, і кінапраекты, рэалізаваныя на базе незалежнага медыя.
«Сістэматычная праца каманды «Белсату» з напрамкам кіно дапамагла захаваць у выглядзе фільмаў сотні аспектаў беларускай рэчаіснасці, а таксама дала магчымасць рэалізаваць свае кінапраекты дзясяткам беларускіх аўтараў, у тым ліку лаўрэатам прэстыжных міжнародных кінафестываляў. Гэтыя кінапраекты, як і інфармацыйная прадукцыя «Белсату», дапамагалі прасоўваць у Беларусі дэмакратычныя каштоўнасці і фармаваць свабодны ад прапаганды светапогляд, а таксама задавольвалі прагу беларусаў да праўдзівай карціны свету», — адзначаецца ў лісце.
«Мы, сябры Беларускай незалежнай кінаакадэміі, выказваем салідарнасць з «Белсатам» на фоне трывожных навінаў датычна будучага існавання тэлеканалу і заклікаем польскія ўлады захаваць «Белсат», а таксама самастойнасць тэлеканалу. На наш погляд, «Белсат» можа быць функцыянальным, а таксама быць голасам вольных беларусаў толькі ў форме самастойнай структуры. Ужо некалькі месяцаў мінула ад абвяшчэння пра аб’яднанне «Белсату» ў адну структуру з TVP World, і за гэты час усё больш зразумелым становіцца, што будучыні ў беларускай незалежнай журналістыкі і незалежнага кіно ў новай структуры не будзе», — гаворыцца ў звароце.
Беларуская незалежная кінаінстытуцыя, падкрэсліваючы шматгадовую падтрымку беларускага тэлеканала польскімі ўладамі ў папярэднія гады, дзякуючы за гэта, лічыць, што згубіць медыя зараз, у складаны і драматычны момант гісторыі, можа стаць вялікай памылкай для інфармацыйнага поля не толькі Беларусі, але ўсходнееўрапейскага рэгіёна.
«Нас непакоіць будучае інфармацыйнае поле Беларусі, а таксама ўсходнееўрапейскага рэгіёна, без «Белсату»і яго праектаў. У часе ўсё больш моцнай і агрэсіўнай беларускай ды расейскай прапаганды аслабіць, а тым больш згубіць «Белсат» было б скрышальна. У часе бесчалавечных рэпрэсіяў у Беларусі і шырокай інфармацыйнай вайны дыктатараў супраць Захаду прайграць тэлеканал на карысць лукашэнкаўскаму рэжыму можа быць катастрафічнаю памылкаю.
Мы ў Беларускай незалежнай кінаакадэміі верым у стваральны патэнцыял праўды і мастацтва. «Белсат» гадамі распаўсюджвае гэтыя каштоўнасці і захоўвае беларусаў у кантэксце дэмакратычнай Еўропы.
Хай заўсёды будуць праўда і кіно! У Беларусі яны патрабуюць «Белсату», — завяршаецца ліст.
Чытаць тэкст звароту цалкам можна тут.
Падпісвайцеся на культурныя навіны Reform.news у Telegram
Если вы нашли ошибку, пожалуйста, выделите фрагмент текста и нажмите Ctrl+Enter.
Может Белсат меняют на Пачобута??