У Вене адкрылася выстава Лесі Пчолкі «Вялікі камень»

Выстава Лесі Пчолкі — мастачкі з Беларусі, якая цяпер жыве ў Берліне, адкрылася ў Вене ў рамках фестывалю Independent Space Index 2024.

Назва выставы Лесі Пчолкі мае прататыпам індустрыяльны парк «Вялікі камень», размешчаны за 25 км ад Мінска. Гэты праект быў запушчаны ў 2010 годзе і з’яўляецца важным чыннікам кітайскай ініцыятывы «Шаўковы шлях», з дапамогай якой Кітай імкнецца пашырыць і ўмацаваць свой геапалітычны ўплыў. Хоць афіцыйна ён называецца індустрыяльным паркам, на самай справе гэта — горад-спадарожнік з уласнай інфраструктурай, жыллём і забаўляльнымі і спартыўнымі аб’ектамі, музеямі, школамі.

Праект не толькі сведчыць аб эканамічных сувязях паміж Кітаем і Беларуссю, але і збліжае дзве краіны ў культурным плане. Бо супрацоўніцтва паміж імі распаўсюджваецца і на іншыя сферы паўсядзённага жыцця і адукацыі. Напрыклад, беларускія школьнікі могуць выбраць вывучэнне англійскай або кітайскай мовы ў школе, а грамадскія месцы ў Мінску ўсё часцей пазначаюцца на рускай і кітайскай мовах.

«Выстава даследуе гіпатэтычную здагадку пра тое, як змяняецца Беларусь, калі яна становіцца часткай новага Шаўковага шляху Кітая», — пазначаецца ў анатацыі. У гэтым працэсе культуралагічнага даследавання мастачка адыходзіць ад палітычных тэмаў і параўноўвае калектыўныя ўспаміны з савецкага мінулага і сучаснасці, працуючы на ўзроўні формы. Напрыклад, выкарыстоўвае карты Беларусі і Кітая на чайных століках, што сімвалізуюць культурную камунікацыю, а ўбудаваныя камеры відэаназірання нагадваюць пра рэпрэсіўныя практыкі, якія выкарыстоўваюцца для кантролю і ціску на грамадзян, — падыходзе, які аб’ядноўвае абедзве культуры.

Аўтарка даследуе стэрэатыпныя традыцыі, такія як макрамэ, тэхніка вязання вузлоў, якая была папулярнай у Савецкім Саюзе і дагэтуль выкарыстоўваецца ў Беларусі для вырабу ўпрыгожанняў, і спалучае яе з шыбары — эратычным мастацтвам бандажу, якое развілася з традыцыйнай ваеннай тэхнікі бандажу і практыкі абмежавання волі цела. Таксама яна змяшчае выявы азіяцкіх людзей на фоне фрагментаў Батанічнага саду, ствараючы контрапункт індустрыяльнаму парку «Вялікі камень».

«Гэта выстава — разважанне пра будучыню», — тлумачыць мастачка.

«Леся Пчолка заклікае да стварэння новай, адкрытай Беларусі, са свежымі ідэямі і структурамі, якія дазваляюць пакінуць мінулае ззаду і вызваліць месца для чагосьці новага. Гэтую Беларусь яшчэ не відаць, але яна намякае на гэта сваёй светлавой інсталяцыяй, у якой ультрафіялетавае святло, які звычайна прымушае прарастаць расліны, заклікана даць гэтай маладой краіне з доўгай гісторыяй штуршок да незалежнасці», — падсумоўвае Міхаэла Гебальтсбергер у анатацыі выставы.

Выстава працуе да 9 чэрвеня ў Вене па адрасе: Hoast, Große Sperlgasse, 25.

Падпісвайцеся на культурныя навіны Reform.news у Telegram