Shuma. Кіеў. 2021 год. Фота: facebook.com/shumaby.
Беларускі этна-электронны гурт Shuma ў наступныя выходныя дае канцэрты ў Грузіі. Яны адбудуцца ў межах вялікага тура KUPALINKA, які ў падтрымку аднайменнага рэлізу каманда распачала ў чэрвені ў Вільні, а яго фіналам стане выступ у Кіеве.
Сёння ў грузінскіх гастролях гурта здарыліся змены: канцэрты Shuma, якія мусілі былі адбыцца 11 і 17 чэрвеня ў Батумі і Тбілісі, перанесены на 17 і 18 чэрвеня адпаведна.
А наступнай кропкай выступу электроннага праекта стане Прага — 23 чэрвеня; а далей будуць Кракаў — 24 чэрвеня, Варшава — 1 ліпеня, і Кіеў — 7 ліпеня.
Нагадаем, што толькі на гэтым тыдні Shuma выклала ў сеціва трэк KUPALINKA і аб’явіла конкурс рэміксаў на вядомую беларускую песню.
«Мы хочам даць гэтай песьні новае дыханьне і зрабіць яе гітом сярод беларусаў і беларусак, расьсеяных цяпер па ўсім сьвеце! — напісалі музыкі на сваёй старонцы ў сацсетках. — Для нас KUPALINKA — гэта знак волі і адраджэньня беларускай культуры, менавіта гэта песьня гучала напачатку маршаў 2020 году, яе ведае кожны і кожная з нас. Таму мы і зрабілі сучасную аранжыроўку KUPALINKA, каб у нас зьявілася свая песьня перамен!».
Музыкі заклікаюць даць песні другое жыццё — і запрашаюць усіх аматараў музыкі далучыцца да конкурсу рэміксаў на слынную кампазіцыю. Уладальнік Гран-пры конкурсу атрымае 1000 еўра, абяцаюць арганізатары праекта.
Падрабязней даведацца пра конкурс можна тут.
Сачыць за турам «KUPALINKA» і набыць квіткі на канцэрты — тут.
Падпісвайцеся на культурныя навіны Reform.by у Telegram