Сёлета лістапад стаў месяцам перакрыжавання двух незалежных беларускіх кінафестываляў. Да 21 лістапада яшчэ працягвае працу Фестываль кіно Балтыйскіх і Паўночных краін «Паўночнае ззянне», які ладзіццца ў анлайн і афлайн фарматах — наперадзе яшчэ восем дзён фэсту. А ўжо 22 лістапада ў Варшаве ў кінатэатры «Ілюзіён» распачынаецца 10-ты фестываль беларускіх фільмаў Bulbamovie. Поўная праграма беларускага кінаагляду з’явілася ў адкрытым доступе, і былі названыя галоўныя цікавосткі кінападзеі.
Так, госцем «Бульбамуві-2024» стане аўтар стужак «Шчасце маё», «Данбас», «Дзяржаўнае пахаванне», «Майдан», «Уварванне» і іншых фільмаў, сусведнавядомы рэжысёр Сяргей Лазніца. Кінематаграфіст родам з беларускіх Баранавічаў прадставіць на фэсце сваю карціну «У тумане» 2012 года, створаную паводле аповесці Васіля Быкава. Паказ вядомай стужкі, якая была адзначана прызам Міжнароднай федэрацыі кінапрэсы ФІПРЭСІ ў Канах, прымеркаваны да 100-годдзя беларускага пісьменніка, якое беларусы адзначаюць сёлета.
Яшчэ адной цікавосткай «Бульбамуві-2024» стане паказ на вялікім экране культавай дакументальнай карціны «Звычайны прэзідэнт» Юрыя Хашчавацкага. Гэты фільм быў створаны ў 1996 годзе, аднак дырэкцыя «Бульбамуві» палічыла важным вярнуцца да стужкі-ўдзельніцы Берлінскага кінафестывалю-1997 у момант, калі рэжым Аляксандра Лукашэнкі дасягнуў адзнакі ў 30 гадоў. Запланавана дыскусія з удзелам рэжысёра.
Заснавальнік і дырэктар фестывалю, кінарэжысёр Януш Гаўрылюк падрыхтаваў для публікі і прэм’еру невядомага дакументальнага фільма пра Алеся Пушкіна. Амаль два гады пісьменік Раман Шэл здымаў беларускага мастака ў Беларусі — да самага яго арышта і прысуду. Гэта матэрыял аформіўся ў карціну «Апошнія словы», якую і ўбачаць гледачы «Бульбамуві».
Фільмам-адкрыццём фэсту стане намінант на найлепшую дакументальную карціну за 2023 год ад Еўрапейскай кінаакадэміі— «Радзіма» беларускіх аўтараў Аляксандра Міхалковіча і Ганны Бадзяка аб беларускай арміі.
Яшчэ ў праграме — вядома, конкурс маладога беларускага кіно, праграма «Беларускі кінапанк», якая прэзентуе свежыя фільмы, знятыя амаль без бюджэтаў.
Ды таксама кінаагляд займеў у сваёй праграме фільмы-намінанты і лаўрэаты міжнародных кінафестываляў апошніх гадоў: дакументальныя карціны «У гасцях» Руслана Фядотава, «Непажаданае сваяцтва» Паўла Мажара, ды нашумелую камерную драму «Пад шэрым небам» Мары Тамковіч, натхнёную гісторыяй Кацярыны Андрэевай і Ігара Ільяша.
Навінкай і эксперыментам стануць на «Бульбамуві-2024» паралельныя кінапаказы. У якасці тэсту тут будуць паказаныя дзве дакументальныя карціны трагічна загінулай, маладой і вельмі перспектыўнай беларускай дакументалісткі Любы Зямцовай. А таксама зняты на Падляшшы фільм Малгажаты Шышко «Магія Падляшша. Шаптухі».
Сёлета фэст беларускага кіно будзе праходзіць з 22 па 24 лістапада ў кінатэатры «Ілюзіён».
Цалкам пазнаёміцца з праграмай кінападзеі можна тут.
Падпісвайцеся на культурныя навіны Reform.news у Telegram
Если вы нашли ошибку, пожалуйста, выделите фрагмент текста и нажмите Ctrl+Enter.