Святлана Ціханоўская: ганаруся быць сучасніцай Алеся Бяляцкага

Святлана Ціханоўская павіншавала беларускага праваабаронцу Алеся Бяляцкага і беларусаў з Нобелеўскай прэміяй міру. Нагадаем, разам з ім узнагароду атрымалі ўкраінскі «Цэнтр грамадзянскіх свабод» і расійская праваабарончая некамерцыйная арганізацыя «Мемарыял».

Прыводзім тэкст віншавання Святланы Ціханоўскай:

«Сёння Алесь Бяляцкі, а за яго плячыма – і ўся вольная Беларусь – атрымалі Нобеля. За яго плячыма – бо Алесь рухаў наперад свае каштоўнасці, беларускую годнасць яшчэ ў тыя часы, калі некаторыя з нас яшчэ не прыйшлі да гэтага, або нават не нарадзіліся на свет. Я віншую нашага героя і ягоную жонку Наталлю Пінчук, якая атрымала Нобелеўскую прэмію за мужа і выступіла з прамовай па-беларуску. Разам з мноствам людзей мне было складана стрымаць слёзы на той прамове. Сёння для нас больш нічога не будзе важней за словы Алеся Бяляцкага. Таму я пакіну тут менавіта ягоныя цытаты:

«Нядаўна ў мяне адбыўся кароткі дыялёг.
– Калі на волю? – спыталіся ў мяне.
– А я і так вольны, у душы, – адказаў я.
Мой вольны дух лунае па-над вязьніцай і над кляновым лістом абрысаў Беларусі».

«Я зазіраю сабе ўсярэдзіну, і здаецца, што мае ідэалы не зьмяніліся, ня страцілі каштоўнасьць, не патускнелі. Яны заўжды са мной, і я ахоўваю іх, як магу. Яны – як адлітыя з золата, і іх не бярэ іржа».

«Мала быць адукаваным і дэмакратычным, мала быць гуманным і міласэрным. Трэба ўмець бараніць свой набытак і сваю Айчыну. Недарэмна ў сярэднявеччы паняцьце Айчыны было тоесным паняцьцю свабоды».

«А 10 сьнежня мне хочацца паўтарыць для ўсіх: «Ня бойцеся!» Гэта тое, што сказаў у 80-я папа Ян Павал II, калі прыехаў у камуністычную Польшчу. Больш ён нічога тады не сказаў, але хапіла. Я веру, бо ведаю, што пасьля зімы наступае вясна».

Спадар Алесь, я ганаруся быць вашай сучасніцай. Мы ўсе марым пра той час, калі Беларусь будзе вольная, а вы і ўсе палітзняволеныя будуць на свабодзе».

Алесь Бяляцкі, заснавальнік і кіраўнік праваабарончага цэнтру “Вясна”, знаходзіцца ў СІЗА з чэрвеня 2021 года па справе “Вясны”. Ён абвінавачваецца ў кантрабандзе (ч. 4 арт. 228 КК) і арганізацыі і падрыхтоўцы дзеянняў, якія груба парушаюць грамадскі парадак, альбо актыўным удзеле ў іх (арт. 342 КК). На думку следства, Бяляцкі і іншыя фігуранты нелегальна ўвозілі наяўныя ў Беларусь для дзейнасці цэнтра, рыхтавалі грамадзян для ўдзелу ў групавых дзеяннях, якія груба парушаюць грамадскі парадак, фінансавалі пратэсты пад выглядам праваабарончай і дабрачыннай дзейнасці, аплочваючы штрафы, матэрыяльна дапамагаючы затрыманым і аплочваючы ім адвакатаў.