Раскопкі гарадзішча на рацэ Менка. Фота: t.me/iinanb.
Падчас раскопак гарадзішча на Менцы археолагі знайшлі два поўныя пахаванні і фрагмент яшчэ аднаго. Яны знаходзяцца ў магільных ямах і перакрытыя культурным пластом старажытнарускай эпохі. «Мы можам з упэўненасцю казаць пра тое, што гэтыя пахаванні XI-XII стагоддзяў», – распавеў карэспандэнту Sputnik загадчык аддзела археалогіі Сярэднявечча і Новага часу Інстытута гісторыі НАН Андрэй Вайцяховіч.
Пахаванне ўнутры гарадскіх сцен — рэдкая з’ява. Гэта можа азначаць, што недалёка ад уезду ў гарадзішча быў храм, а вакол яго маглі быць пахаваныя толькі прадстаўнікі мясцовай эліты.
Гэта пакуль толькі здагадка, таму што ўсе пахаванні ідуць без інвентара. Аднак у XI-XII стагоддзях хрысціянства яшчэ не было масавым і простых людзей працягвалі хаваць у курганах.
Андрэй Вайцяховіч мяркуе, што на гарадзішчы знаходзілася самая старажытная хрысціянская царква ў рэгіёне. Дакладна лакалізаваць яе будзе складана, па ўсёй верагоднасці яна была драўлянай.
Сёлетнія археалагічныя даследаванні пацьвердзілі, што Менск быў заснаваны на рацэ Менка ў Мінскім раёне. На месцы раскопак плануецца стварыць музейны комплекс, для гэтага збіраюцца ўзнавіць уваходную групу — вароты з вежай, драўлянымі пераходамі і абарончыя канструкцыі. Унутры гарадзішча пабудуюць некалькі жылых і гаспадарчых дамоў і з дапамогай знойдзеных артэфактаў пакажуць побыт старажытных людзей.