Названы лаўрэаты «Нацыянальнай прэміі ў галіне выяўленчага мастацтва-2023». Тры намінацыі засталіся без пераможцаў

Урачыстая цырымонія ўзнагароджання пераможцаў Рэспубліканскага конкурсу«Нацыянальная прэмія ў галіне выяўленчага мастацтва ў 2023 годзе» адбылася ў Нацыянальным цэнтры сучасных мастацтваў 22 лістапада. З дзесяці першапачаткова заяўленых намінацыяў тры засталіся без пераможцаў.

Так, конкурс не адбыўся ў намінацыях «Мастацкая фатаграфія», «Актуальнае мастацтва» (арт-аб’ект, інсталяцыя), «Мастацтвазнаўства і крытыка» — па сутнасці, намінацыяў, што сведчаць пра развіццё мастацтва і яго асэнсаванне. Яны згадваліся ў Інструкцыі аб парадку арганізацыі правядзення «Нацыянальнай прэміі ў галіне выяўленчага мастацтва-2023» на сайце міністэрства культуры, але зніклі з канчатковага пераліку кірункаў, у якіх былі абраныя пераможцы.

Так, у сямі іншых конкурсах былі вызначаны наступныя лаўрэаты:

• Аляксандр ШАППО — у намінацыі «Манументальнае і манументальна-дэкаратыўнае мастацтва»;
• Андрэй ВАРАБ’ЁЎ — у намінацыі «Скульптура»;
• Васілій ВАСІЛЬЕЎ — у намінацыі «Жывапіс»;
• Наталля ЛІСОЎСКАЯ — у намінацыі «Дэкаратыўна-прыкладное мастацтва»;
• Марта ШЧЭРБІЧ — у намінацыі «Творчы Дэбют»;
• Усевалад ШВАЙБА — у намінацыі «Графіка»;
• Глеб ОТЧЫК і Сяргей ВАРКІН — у намінацыі «Дызайн».

Вядомы мастак-кераміст ды арганізатар і кіраўнік пленэраў па кераміцы «Арт-Жыжаль» Валерый КАЛТЫГІН быў адзначаны «За ўклад у развіццё выяўленчага мастацтва».

«Нацыянальная прэмія ў галіне выяўленчага мастацтва» была заснавана Міністэрствам культуры ў 2017 годзе ў мэтах: адраджэння, развіцця, папулярызацыі і паказу лепшых традыцый і дасягненняў нацыянальнага выяўленчага мастацтва, павышэння прафесійнага майстэрства ўдзельнікаў конкурсу, выяўлення і падтрымкі таленавітай моладзі, развіцця творчых здольнасцей.