Мінскі музей запрашае даведацца, як жылі ў Лошыцкай сядзібе ў мінулыя стагоддзі

Музей «Лошыцкая сядзіба» запрашае ў сядзібны дом на тэматычныя экскурсіі з танцавальнымі майстар-класамі.

Установа прапануе дзве праграмы «Адзін дзень з жыцця Лошыцы ў XVI – XVII стст.» і «Адзін дзень з жыцця Лошыцы ў XVIII — сярэдзіне XIX стст.».

У першай з іх пазнаёмяць з асобай князя Друцкага-Горскага і іншымі прадстаўнікамі старажытнага беларускага княскага роду. Раскажуць, як яны бавілі час і чым займаліся ў сваім маёнтку.

Падчас экскурсіі правядуць майстар-клас па знаёмстве з культурай танца эпохі Адраджэння ў прадстаўнікоў вышэйшых слаёў сярэднявечнага грамадства, пачынаючы ад пранікнення народнага бранля (карагод) у арыстакратычны асяродак і яго наступнага развіцця ў паване (танец-шэсце), а ў XVII ст. – у прыдворны танец менуэт.

Першая згадка князёў Друцкіх-Горскіх у сувязі з Лошыцай датавана канцом ХVІ стагоддзя. Князь Рыгор Друцкі-Горскі атрымаў адзін з Лошыцкіх маёнткаў праз шлюб з князёўнай Тамілай Багданаўнай Заслаўскай. У 1597 годзе Лошыцу Гарнастаеўскую атрымаў у спадчыну князь Фёдар Друцкі-Горскі, яна была яго асноўным маёнткам. Пасля ёй валодалі нашчадкі князя Фёдара.

Аднак найбольшага росквіту Лошыца дасягнула за княскім родам Прушынскіх у XVIII—XIX стагоддзях, калі была фактычна пабудаваная наноў сядзіба, створаны шэраг гаспадарчых будынкаў.

Экскурсія «Адзін дзень з жыцця Лошыцы ў XVIII — сярэдзіне XIX стст.» раскажа пра Лошыцу Прушынскіх. Цягам экскурсіі наведвальнікі даведаюцца аб будаўніцтве новага дома на маляўнічым беразе Свіслачы, аб развіцці танцавальнай культуры ў XVIII – сярэдзіне XIX стст., аб бальных жаночых атрыбутах, аб таемнай мове дам і кавалераў.

Майстар-клас пазнаёміць з асноўнымі фігурамі і крокамі паланэза (танца-шэсця), які адкрываў бал, і папулярнымі кадры і полькай.

Расклад экскурсій на ліпень:

Экскурсія «Адзін дзень з жыцця Лошыцы ў XVI-XVII стст.»:

• 1 ліпеня (субота) — 12:00
• 15 ліпеня (субота) — 12:00
• 22 ліпеня (субота) — 12:00

Экскурсія «Адзін дзень з жыцця Лошыцы ў XVIII — сярэдзіне XIX стст.»:

• 2 ліпеня (нядзеля) — 13:30
• 16 ліпеня (нядзеля) — 13:30
• 23 ліпеня (нядзеля) — 13:30

Як запісацца на экскурсіі, можна паглядзець тут.

Падпісвайцеся на культурныя навіны Reform.by у Telegram