Гімн «Жыве Беларусь!» праспявалі на парадзе 3 ліпеня. Толькі з іншымі словамі

3 ліпеня на парадзе ў «выкананні» салістаў Опернага тэатра і аматарскага хору пад фанаграму прагучаў гімн «Жыве Беларусь!». Толькі песня аўтарства паэта Леаніда Пранчака і кампазітара Васіля Раінчыка была выканана ў іншай інтэрпрэтацыі — быў моцна зменены тэкст кампазіцыі. Гімн прагучаў без словаў «Пагоня», «Магутны Божа», «Паспаліты народ» і ўласна «Жыве Беларусь!», заўважыў блогер Ярузельскі.

Падобна на тое, што тэкст Леаніда Пранчака быў істотна перапісаны. Замест «Жыве Беларусь!» у кампазіцыі гучала «Красуй Беларусь!»: увогуле ад першапачатковага арыгіналу засталіся толькі «рожкі ды ножкі».

Блогер прапаноўвае параўнаць адцэнзураваную версію і арыгінальную.

Гімн «Жыве Беларусь!» быў напісаны ў 1990 годзе на словы паэта Леаніда Пранчака і музыку кампазітара Васіля Раінчыка і змяшчаў адсылкі да іншых гімнаў Беларусі.

На пачатку 1990-х гадоў песню прапаноўвалі ў якасці дзяржаўнага гімну Беларусі, але прапанову адпрэчыў колішні Вярхоўны Савет Беларусі.

Арыгінальны тэкст кампазіцыі выглядае так:

«Жыве Беларусь! Веру, будзе жыць заўсёды!
Сьвятло Пагоні будзе сэрцы нашы акрыляць.
Жыве! Жыве наш Край магутны і свабодны,
Нескароная нікім і сьвятая Зямля.
Беларусь! Беларусь! Хай цябе мінуць усе нягоды.
Век у шчасьці жыві, ты Радзіма мая!

Жыве Беларусь, нашай волі абуджэньне.
Краіна-маці, ты прызнаньне шчырае прымі.
Жыве! Жыве, гучыць узьнёсла бласлаўленьне
Беларускі горды дух увасстаў з даўніны.
Беларусь! Беларусь, мы тваё вітаем Адраджэньне
Будзеш вечна вольнай ты, будзем вольнымі мы.

Жыве Беларусь! Нас нядоля не здалела.
Магутны Божа, беражы Айчыну з году ў год.
Жыве, жыве, як непагасны сымбаль веры,
Будзеш вечна на зямлі паспаліты наш Род.
Беларусь, Беларусь, пад штандарам бел-чырвона-белым
Век у шчасьці жыві Беларускі Народ!»

Падпісвайцеся на культурныя навіны Reform.news у Telegram