Фота: supremstorm.gck.by
У ноч з 29 лютага на 1 сакавіка ў будынку Цэнтра культуры «Віцебск» пройдзе #СУПРЕМSTORM_ноч мастацтва. Яго сёлетняя назва — «Сусвет унутры Малевіча».
Менавіта ў Віцебску Казімір Малевіч упершыню выпрабаваў свой педагагічны метад, выпрацаваў уласную педагагічную сістэму і напісаў галоўную філасофскую працу.
Праграма распачнецца арт-батлам у 18.00, яго тэма — сусвет унутры кожнага мастака. Мастакі на вачах у гледачоў будуць працаваць над творамі візуальнага мастацтва, распрацоўваючы стылістыку футурызму, супрэматызму, трэш-арта.
Вынікі батла падвядзе экспертная рада ў 21.00.
У 18.00 адкрыецца выстава плакатаў і арт-аб’ектаў студэнтаў Віцебскага дзяржаўнага тэхналагічнага ўніверсітэта. Экспазіцыя «Віцебск. Тут быў УНОВІС» пакажа, як на кафедры дызайну і моды ў навучальным працэсе рэалізуюць створаную Малевічам праграму УНОВІС.
У 19.00 на лекцыі-перформансе «Малевіч навыварат» раскажуць пра час, калі ў Віцебску працавала творчая лабараторыя мастака-авангардыста, таксама пра тое, што такое колер і аб’ект у мастацтве. Фармат лекцыі-перформансу быў рэалізаваны Казімірам Малевічам у 1920 годзе, калі ў Віцебску адбыўся вечар Малевіча, дзе дыскутавалі пра тое, што такое сучаснае мастацтва, а пасля паказалі футурыстычную оперу «Перамога над сонцам» з дэкарацыямі і касцюмамі Казіміра Малевіча.
Гасцей запросяць у «Лабірынт Малевіча». Выстава-перформанс з такой назвай вядзе на лесвіцу старога будынка Цэнтра культуры.
Прастору ўпрыгожаць карціны з галерэі арт-батла і Фонду маладзёжнага тэатра «Кола». Выстава будзе размяшчацца на лесвіцы, і светлавых прыбораў на ёй не будзе.
Медыяперформанс «М-Адысея» аўтар праекта музыка і гукарэжысёр Сяргей Цвікі называе тэхнічным эксперыментам з часам і прасторай. Гэты аўдыявізуальны эксперымент створаны на аснове палявых запісаў, пераплеценых з выпадковымі алгарытмамі лічбавых і аналагавых машын, якія кіруюцца чалавекам.
Завершыць праграму ночы мастацтва ў Віцебску гонг-перформанс «Вока Буры». Удзельнікі змогуць звярнуцца да сваіх унутраных вобразаў у «Месцы цішыні». Спакой унутры шторму — так апісваюць асноўную тэму медытатыўнай часткі.
Мультыжанравы фестываль #СУПРЕМSTORM_ноч прысвечаны творчаму аб’яднанню УНОВІС і 145-годдзю з дня нараджэння Казіміра Малевіча.
Квіткі — па спасылцы альбо у касах горада.
Дата: 29 лютага
Пачатак у 18.00 (час мясцовы)
Месца: Цэнтр культуры «Віцебск», вул. Маякоўскага, 1, Віцебск.
Падпісвайцеся на культурныя навіны Reform.by у Telegram