«Вандроўкі па маіх ваколіцах» — конкурс гісторыка-краязнаўчых работ з такой назвай абвясціў сёння Нацыянальны гісторыка-культурны музей-запаведнік «Нясвіж». Конкурс прымеркаваны да 200-годдзя паэта, публіцыста, драматурга і аднаго з пачынальнікаў беларускага краязнаўства Уладзіслава Сыракомлі.
«Можна пісаць пра гісторыю вёсак, мястэчак, гарадоў, распрацоўваць новыя турыстычныя маршруты, даследаваць архітэктурна-гістарычныя і прыродныя помнікі, старыя могілкі і капліцы», — даецца інфармацыя на сайце ўстановы.
Да ўдзелу ў конкурсе запрашаюцца навучэнцы, студэнты, настаўнікі і выкладчыкі, работнікі культуры, краязнаўцы-аматары — усе, хто цікавіцца мінуўшчынай.
Уладзіслаў Сыракомля (Людвік Уладзіслаў Францішак Кандратовіч) навучаўся ў павятовай школе пры дамініканскім кляштары ў Нясвіжы, пакуль яе не закрылі расійскія ўлады ў 1835 годзе. У 1840 годзе ён уладкаваўся на службу ў канцылярыю кіраўніцтва радзівілаўскімі маёнткамі.
«У сваіх творах [Уладзіслаў Сыракомля] даў апісанне шэрагу рэгіёнаў Беларусі, заклікаючы чытачоў уважлівей даследаваць «кожны закуток краю”. Звароту да мінуўшчыны спрыяла праца Уладзіслава Сыракомлі ў Нясвіжы. Атмасфера старажытнага горада і знаёмства з багатымі зборамі радзівілаўскага архіва абуджалі цікавасць да гісторыі», — адзначаецца на сайце музея-запаведніка «Нясвіж».
Прыём работ конкурсу «Вандроўкі па маіх ваколіцах» будзе ажыццяўляецца з 1 ліпеня па 20 жніўня 2023 года. Высылаць тэксты варта на адрас — [email protected].
Вынікі конкурсу будуць падведзены ў Нясвіжы 28 верасня 2023 года — напярэдадні 200-годдзя Уладзіслава Сыракомлі, якое адзначаецца 29 верасня 2023-га. Пераможцаў чакаюць прызы і падарункі.
Падрабязней пра ініцыятыву музея-запаведніка «Нясвіж» можна чытаць тут.
Падпісвайцеся на культурныя навіны Reform.by у Telegram
Если вы нашли ошибку, пожалуйста, выделите фрагмент текста и нажмите Ctrl+Enter.
Сообщить об опечатке
Текст, который будет отправлен нашим редакторам: