Кадр з фільма "Чатыры колы далей ад цэнтра". Фота: vodblisk.northernlightsff.com.
«Чатыры колы далей ад цэнтра» — дакументальны партрэт мінскай мастачкі Марыны Капілавай вачыма рэжысёркі Лены Ле даступны для прагляду у анлайн-кінатэатры Vodblisk. Гэта стужка пра свабоду ў свеце, які ты для сябе ствараеш сам. Фільм удзельнічаў у Беларускім конкурсе кінафэсту «Паўночнае ззянне-2023» і стаў адным з пераможцаў галасавання гледачоў.
Чатыры асобы, якія асабіста ведаюць Марыну, расказваюць гісторыі, звязаныя з жыццём жанчыны. Сябры, калегі ды суседка па двары. Паралельна з гэтымі аповедамі сама мастачка паўстае ў кадры і дзеліцца сваім поглядам на свет, жыццё. Гісторыі герояў перакрыжоўваюцца, рэальнасць уступае ў спрэчку з фантазіяй.
Фільм рэжысёркі Лены Ле дае магчымасць з аскепкаў меркаванняў сабраць свае цэлае. Паступова, з кожным новым колам, успрыманне асобы гераіні становіцца больш насычаным і шчыльным.
З’яўляючыся ў кадры Марына Капілава фехтуе, працуе над сваімі скульптурамі і нават вучыць хадзіць па столі, а паміж гэтым вельмі шмат разважае пра рознае: пра халодную зброю і высакароднасць, абарону іншых людзей, існаванне ў грамадстве, калі ты непадобны на іншых, пра каханне і жыццё ў адной прасторы.
У адным з такіх маналогаў гераіня закранае тэму, якая сёння асабліва актуальная: «Калісьці я кідалася абараняць сваіх сябровак, хаця вельмі баялася тых, ад каго я іх абараняю. Маленькія брыдкія хуліганы ці буйныя хуліганы, ці проста якія-небудзь. Я кагосьці праводзіла, а потым ішла дадому адна і мне было вельмі страшна: і праводзіць, і ісці дадому. Я дэманстравала гераічныя паводзіны, зусім не будучы героем».
Сіла гэтага фільма ў тым, што ён не толькі расказвае пра асобу Марыны, але і дазваляе паразважаць над уласнымі жыццёвымі арыентырамі.
VODBLISK — анлайн-кінатэатр, які імкнецца прасоўваць незалежнае беларускае кіно і даваць голас незалежным беларускім фільммэйкерам і фільммэйкеркам. Новыя фільмы з’яўляюцца на платформе штомесяц, доступ да любога з іх можна купіць на 30 дзён. Гледачы, якія знаходзяцца на тэрыторыі Беларусі, могуць глядзець увесь рэпертуар медыятэкі VODBLISK бясплатна, доступ да аднаго фільма з-за мяжы каштуе 5 долараў. Падтрымаць праект можна тут.
Гледзець фільм «Чатыры колы далей ад цэнтра» можна тут.
Падпісвайцеся на культурныя навіны Reform.by у Telegram