Фота: facebook.com/paulantipov9.
«Гэта выдавецтва, якое пачынаецца без якіх-небудзь стартавых укладанняў, у нас няма ні спонсараў, ні грантадаўцаў, а адпаведна, мы не павінны прыслухоўвацца да нечых пажаданняў, пакуль што мы робім, што хочам, проста таму, што гэтага хочам, мы выдаткоўваем на гэта свой асабісты час. Хто гэта — мы, раскажу ў афіцыйным пасце», — сёння на сваёй старонцы ў сацсетках пісьменнік, літаратурны крытык і рэдактар медыя «Літрадыё» Павел Анціпаў анасаваў адкрыццё новага выдавецтва. Пакуль гэта не афіцыйная аб’ява, ды ўсё ж важная навіна.
Для старту новая ініцыятыва выбрала перавыданне культавай кнігі беларускага філосафа Валянціна Акудовіча «Мяне няма: роздумы на руінах чалавека». Кніга і дала назву новаму выдавецтву.
«Мы будзем друкаваць тое, чаго, кажуць, няма — новую беларускую літаратуру. Вядомых ужо пісьменнікаў ды пісьменніц, ці невядомых — не важна. Проста паспрабуем дастаць з «няма» ўсё, на што хопіць сіл. Плануем таксама перавыдаваць кніжкі 2000-2020 гадоў, якія падаюцца нам важнымі і якіх таксама ўжо няма», — акрэсліў праграму сваёй ініцыятывы Павел Анціпаў.
На сёння «дэбютны Акудовіч» ужо дасяжны для заказу. Нагадаем, што зборнік упершыню быў надрукаваны ў 1998 годзе, зараз выдавецтва перавыдае «Мяне няма: роздумы на руінах чалавека», дэманструючы актуальнасць думак беларускага філосафа.
«Замовім для вас асобнік у першым тыражы, заадно і падтрымаеце нас. Я нават падпішу для вас гэтыя першыя экземпляры ў Акудовіча, калі ўсё будзе добра», — абяцае спадар Павел.
Кніга па пошце даходзіць у Беларусь і іншыя краіны Еўропы.
Падрабязней пра новае выдавецтва тут.