Сёння ў Варшаўскім універсітэце назвалі трох пераможцаў літаратурнай прэміі Ежы Гедройця.
І месца заняла кніга Сяргея Абламейкі «Невядомы Менск. Гісторыя знікнення. Кніга першая» (Радыё Свабодная Эўропа/Радыё Свабода, 2021).
«Невядомы Менск. Гісторыя знікнення» – гэта першае навуковае даследаванне пра час і прычыны разбурэння Старога горада, яго загадкі, яго герояў і антыгерояў. Ніводнага артыкула, ніводнай манаграфіі, ніводнай навукова-папулярнай кнігі не напісалі раней беларускія гісторыкі пра разбурэнне Старога горада – аднаго з самых каштоўных раёнаў гістарычнага Менска. Паўтара дзясятка вуліц і завулкаў, шчыльна забудаваных мураванымі дамамі XVII–XIX стагоддзяў, што існавалі на Замкавай гары і яе ваколіцах, зніклі без следу.
На цырымоніі ўручэння прэміі Сяргей Абламейка сказаў: «Гэта кніжка пра найвялікшую мару майго жыцця: я б вельмі хацеў убачыць калі-небудзь адноўленую забудову Замкавай гары і Нізкага рынку. І вельмі важна, каб людзі падзялілі гэтую думку.
Я лічу, што сёння беларуская культура дыхае на адно лёгкае. Другое лёгкае – матэрыяльны цывілізацыйны кантэкст – амаль знішчана, амаль выразана. І калі беларусы не адновяць гістарычныя цэнтры Менска, Горадні, Берасця, Полацка, Віцебска, Магілёва, Пінска і Наваградка, то так і будзем мы дыхаць на адно лёгкае».
ІІ месца атрымала Вольга Гапеева з кнігай «Самота, што жыла ў пакоі насупраць» (Мінск, «Галіяфы», 2021).
ІІІ месца – у кнігі «Жэнька, каралева мышак» Валерыя Гапеева (Мінск, «Кнігазбор», 2021).
Прэмія Ежы Гедройця – найбуйнейшая незалежная літаратурная прэмія Беларусі, якая ўручаецца штогод з 2012 года за найлепшую кнігу мастацкай ці дакументальнай прозы, выдадзеную ў папярэднім годзе на беларускай мове.
Арганізатарамі прэміі з’яўляюцца Беларускі ПЭН-цэнтр і Міжнародны саюз беларускіх пісьменнікаў. Партнёр – Цэнтр даследаванняў Усходняй Еўропы Варшаўскага ўніверсітэта.
Сёлета ў склад журы ўвайшлі: літаратуразнаўца Ульяна Верына; крытык, літаратар Сяргей Дубавец; пісьменніца Святлана Курс; паэт, перакладчык Андрэй Хадановіч; крытык, літаратуразнаўца Ціхан Чарнякевіч.
Летась прэмію імя Ежы Гедройця атрымала Ева Вежнавец за кнігу «Па што ідзеш, воўча?».
На ўзнагароду прэтэндавалі кнігі, выдадзеныя ў 2021 годзе:
Сёлета ў конкурсе маглі ўдзельнічаць усе аўтары незалежна ад таго, ці перамагалі яны раней. Усё намінанты на прэмію ганаруюцца дыпломамі фіналістаў.
Падпісвайцеся на культурныя навіны Reform.by у Telegram