У Кіеве бульвар Дружбы народаў хочуць перайменаваць у бульвар імя Лізаветы ІІ

Адпаведная петыцыя з’явілася на сайце Кіеўскага гарадскога савета.

Ініцыятар прапановы — кіеўлянін Олександр Леонаў у сваім звароце пазначае, што нябожчыца каралева Вялікабрытаніі Лізавета ІІ прыклала шмат намаганняў для падтрымкі Украіны. Таму яе імя вартае ўвекавечвання ў Кіеве і іншых гарадах Украіны.

Гэтаксама спадар Олександр прапануе перайменаваць у гонар Лізаветы ІІ і плошчу Герояў Вялікай Айчыннай вайны.

На дадзены момант петыцыя сабрала больш за дзве сотні подпісаў.

Каралева Вялікабрытаніі і Паўночнай Ірландыі ды каралеўстваў Садружнасці Лізавета ІІ памерла 8 верасня на 97-м годзе жыцця. Яна кіравала краінай семдзесят гадоў.

Сёння яе сын Чарльз афіцыйна абвешчаны каралём Вялікабрытаніі Карлам ІІІ.

Падпісвайцеся на культурныя навіны Reform.by у Telegram